نقإی به کتاو مي‌نويسم انديکا

پيش‌کش به هو که ويره مند و دلسوإه قومسه

به دنبالت سرتاسر اين خاک پاله پاله را دويدم

وا خوندن کتاو اولين چي يي که به وير آإم ايا يونه که نويسنده و شاعر کتاو دغدغه اصليس يونه که چه طَو تَره به ايما بُگوهه که قوم لر قومي يه که موندگاريس به يونه که تا تريم وا يَک بوييم دَ زه کاسه برار بهری خَوَري ني همو جور که آقای رهإار مئن کتاو کهبنگ به ايما هَشاره اکرد:

اير چه دستم زه  دستت ديره      زت ايخواستم دلامون يک بگيره

کموتر گَل گِرهإ وا گله بازی      نإيإم   هيچ  لري  سي لر بميره

هَره گپ زيإن زه هر چي قلاوه آسونه اما تلاش و کوشايشت کِردِن مئن رَس کاری فره گپ و زه اندازه به درِ ، اما اير آإم هاشق و دلسوإه بو انجوم داإن چُنو کاری راحت ايبو سيس، درسته که روزگار و مردمونس آإم دل زَمَند اکنن اما هإن کسونايي که دل به گرو عشق نهاإنه و وا تمام وجوإ زه دين انجوم داإن کارا گپ تر زه توان آإما مَعمولينه تا به ايما ثاوت کنن که اير آإم بخوا تَره همه کاري انجوم بإه ايچو دَ قإرت اراإه حرف ازنه نه چي دَر.

به قول شاپيا تموم شئرگوها حافز :

چوعشق آسان نمود اول            ولي اوفتاد مشکلها

نويسنده کتاو وا تک تک بيتاس ايمانه اِبَره به وُلات انجه انجه لرستان که هر شقس رهإه به يه دياري

به ولاتي که حُيمِ دامونه داره ، و احترام به دا واجُوِ ، اي ولات چي تهإه اي يه که ايما مئنس گپ آبيإيمه ، آيا روا هإ که آإما تهإه خوسونه زه ويرسون بِوَرن نه نَتَرِن حُيمَن نترن هونو خو ماشين آهنی نيإن هونو زه گوشت و پوستن.

شاعر وا شئرس زه تَمارزياس اگو ، خوندن کتاو زه آرزوا سر به مهري حَکايَت اِکنه که گشا يه روزی جُوِ حقيقت به وَر کنن گشا ايما هو روزنه بوينيم وا تيا خومون، نويسنده زه دسته چواسه نويسون قلاوه زمنده و دلس ز دست هونو پر زه شکوه ، هونو که تاريخ نه سي پيل اِوُرگَنن تا گشا حقيقت نه نِهو کِردِه بون تا خوش خدمتی کرده بون به پيل و صاحاو پيل هونو  غير زه يو که دنيانه بپرستن کاری نارن و نوشته هاسون پر زه حقيقا وارينه هإ حقيقتايي که هر کي بخونسون تَی خوس فرگ اکنه جز يونو ده چي يي راست ني .

اي وُلات دير وختي يه که زمند و زَهمي دشنه ها نامردموني يه که نيخوان هو پابرجا بو و پابرجا بِمَهنه کتاو مي نويسم انديکا سکوت دُنگ داري يه مئن هياهو اي دوره زمونه ، سکوتي که ايمانه دَوَت اکنه به خوإفهمي و کل نئری

به اميإ سردياري قوم عزيز لر